لغة القالب
ابحث عن ما تشاء

هو السايبر سكيورتي محتاج كام سنة عشان اتعلمه؟

 سؤال بيجيلي كتير فحبيت اجاوب حضراتكم في مقال أفضل. تعالي نخرج بره سياق السؤال شوية ونقول انه انا عاوز اتعلم صيني بحيث اقدر اتكلمه. تفتكر هحتاج وقت قد ايه؟ انا بسأل بجد..

السايبر سكيورتي تخصص معقد يهدف إلى حماية الأنظمة والبيانات من التهديدات الإلكترونية. يعتمد على فهم عميق للبرمجة وتحليل الشبكات. لتعلمه بشكل جيد، يعتمد ذلك على الخلفية البرمجية للفرد والمجهود اليومي، وقد يحتاج الفرد لعدة سنوات لتحقيق مستوى عالي من الاحتراف.

الموضوع نسبي بحت ومختلف من شخص للتاني

كل واحد فينا عنده ظروفه غير التاني كل واحد عنده قدرة استيعابية غير التاني اعتقد سؤال محتاج قد ايه علشان اتعلم مجال معين دا سؤال مالهوش اجابة

تختلف فعلاً ع مدي الاستيعاب والفهم الشخصي ، والقدرة ف إنك تستغل الوقت دا صح متقعدش تقول وتعيد وتزيد وتستني فرصة وبتاع بس الفرصة دي مستحيل تجيلك ع طبق من دهب أنت لازم تبدأ مهما كانت الظروف ومهما كان الوقت طالما عايز حاجه اسعي عليها ودا فعلاً اللي اغلب الناس متعرفهوش .....

Cyber Security


الإجابة هي, كل ما اديت للمذاكرة والتطبيق العملي وقت اكبر كل ما اتعلمت اسرع, واكيد اسرع حاجه هي التطبيق العملي.

ايه ده يعني ملهاش كتالوج اجابة واقولك شهر او اقولك سنتين؟

لا ملهاش كتالوج. اعرف ناس لمت الأساسيات اللي محتاجاها كلها في تلات شهور (شوف البوست اللي عندي في البايو) وذاكر السايبر سكيورتي نفسها في تخصص زي ال Pentesting في 3 شهور كمان وفي خلال ست شهور كان جاهز يشتغل ك Junior Pentester واعرف حد والله بدأ من التلفون, يعني من غير لاب توب حتي, فكان بيتفرج علي فيديوهات ويجرب كله كله من التلفون!

بينما اعرف ناس تانية بيجي كل سبع تمن شهور يبعتلي رسالة يقولي هو ايه افضل لاب توب ابدأ بيه؟ اصل دورت ومش لاقي كورس حلو ابدأ بيه, اصلي مش لاقي roadmap حلوة فمكملتش اصل اصل اصل وأعذار من هنا للسنة الجاية.

الحسبة بسيطة يا معلم, المصادر كلها قدامك وعندك جوجل لو عطلت. متعتمدش علي انه فلان مردش فمش هكمل ومتعتمدش علي اني ملقتش رود ماب فمش هكمل. معاك لاب توبك مهماااا كانت امكانياته وعندك البوست الموجود في البايو عندي او حتي ابحث في جوجل وتوكل علي الله. بس كده. ده اللي انت محتاجه. وافتكر كويس يا صاحبي, انت الحاجز الوحيد بين نفسك وبين النجاح في أي مجال.



هل دراسة ccnp. مضيعة للوقت ؟


مفيش اي حاجه هتدرسها في التكنولوجيا هتبقي مضيعه للوقت. انت عاوز تطلع مهندس شبكات او تشتغل في النت ورك سكيورتي؟ يبقي ادرس شهاداتها. مش عاوز وعاوز تطلع حاجه تانيه يبقي ادرس شهادات الحاجة التانية متبقاش عاوز الشرق وبتذاكر الغرب وبتسال هتضيع وقتك ولا لا. فلازم تقرر انت عاوز تتخصص في ايه. طب مش عارف؟ يبقي شوف البوست اللي في البايو عندي موضح فيه التخصصات وشوف انت حابب ايه اكتر وكمل فيه.
بالتوفيق ان شاء الله

هل عامل السن يؤثر على ايجاد وظيفة بالنسبة للبرمجة او السايبر سيكوريتي

هل الشركات تفضل السن الصغير ولا مفيش فرق عادي
مهاراتك هي اللي بتحكم .. شوفت ناس متعلمين المجال بعد ال٥٠ بشوية حلوين واشتغلوا ما شاء الله
يعني لو عندك المهارة بمشيئة الله تلاقي الوظيفة حتى لو ٧٠ سنة

ياما سمعت عن ناس اشتغلت في سن كبير فعليا عشان مهاراتهم مناسبة .. وافتح منصات QUORA و REDDIST وشوف الناس اللي اتعلمت في سن كبير

1- هو السن بيفرق يا هندسة عشان نفسي اتعلم المجال بس حاسس اني كبرت

- أه بيفرق, لو انت عديت ال 70. غير كده مبيفرقش.

2- هو المجال ده هيكون لسه موجود كمان 5 سنين يا هندسه ولا ال AI وال ML وال KFC هيقضو عليه؟

- لا هيفضل موجود عادي. طول ما في انترنت كل مجالات التكنلوجيا هتفضل موجوده عادي.

3- هو المجال ده فيه فلوس يا هندسة ولا اذاكر حاجه تانيه أحسن؟

- أي مجال فيه فلوس وأي مجال فيه شغل فمصر وبره مصر. فمتضيعش وقت في النوع ده من الأسئلة وركز علي انك تقوي نفسك عشان الشركات تقبلك.

4- هو انا لو بدرس تجارة او طب ينفع احول للمجال عادي ولا لازم ابقي دارس في نفس التخصص؟ 

- دراستك في نفس التخصص هتسهل عليك كتير. لكن مفيش اي مانع من انك تكون دارس حاجه مختلفة. معانا في المجال خريجين تجارة وشريعة وقانون وطب وهندسة ميكانيكا الخ وناجحين جدا جدا في المجال. بس هما ضغطو علي نفسهم واتعلمو واجتهدوا,  فطول ما بتجتهد هتلاقي نتيجة تعبك.

5- انت عامل roadmap وفلان وعلان عاملين roadmap أمشي علي انهي واحده فيهم؟

- أي واحده فيهم هتوصلك. فببساطه اختار شخص بتثق في علمه وامشي علي ال roadmap اللي هو حاطتها ومتبصش علي اي roadmap تانيه حتي لو مليون واحد قالولك انهم لقو واحده احسن. لما تخلص الأولي انت لوحدك هتعرف تحدد ايه اللي انت محتاجه.

6- انت كاتب كورسات كتير اوي يا هندسة متشوفلي كورس واحد لامم الدنيا

- مفيش حاجة اسمها كده. أي مجال من مجالات التكنلوجيا مينفعش تتعلمه بكورس واحد ولا بين يوم وليله. محتاج مذاكرة وتدريب وسنة تقريبا عشان تفهم الدنيا كويس (سنة تقل او تزيد علي حسب اجتهادك). فاستعن بالله كده وخليك صبور.

7- انا قدامي تخصص حسنين ومحمدين بس محتار اختار انهي يا بشمهندس أرجوك ساعدني واللي هتقولي عليه هختاره علطول

- متخليش حد يحددلك مستقبلك يا صديقى حتي لو كان مين. انت بتحب ايه؟ اختاره. مش عارف بتحب ايه؟ يبقي نغير السؤال, انت عايز تبقي ايه؟ برده مش عارف؟ يبقي اقرأ عن المجالات دي من مواقع مختلفه وصلي استخاره واختار اللي نفسك مرتحاله أكتر.


Mesh Ebrahem Hegazy


              
ديسمبر 03, 2023

عدد المواضيع