قبل ان تشتري هارد مستعمل اهم 3 نصائح

مع غلاء الاسعار يتوجه العديد من المستخدمين الي سوق المستعمل في شراء مستلزمات الكمبيوتر ومنها بالطبع الهارد المستعمل، وفي هذا الموضوع نستعرض اهم النصائح لشراء هارد مستعمل بدون ان يضحك عليك.

3 نصائح لو ها تشترى هارد مستعمل

لو تشترى هارد مستعمل او اى جهاز او لابتوب فيه هارد مستعمل خد بالك

تاريخ الانتاج:

مهم جدا انك تعرف تاريخ الإنتاج لاى هارد وما تفرحش انك رايح تشترى هارد ٣ تيرا ب٧٠٠ جنيه وهو انتاج 2007 مثلا يعنى، فحضرتك ما تتوقعش منه أداء فائق لأنه ببساطه اتهلك شغل

طب ازاى اعرف تاريخ انتاج الهارد؟

مكتوب عليه. اما التاريخ مكتوب صريح زى ما بتعمل ويسترن وهيتاشى وسامسونج وتوشيبا.

حطت لك فى الصور تحت مكان تاريخ تصنيع كل هارد فى المستطيل الاحمر

واما بشكل رخم زى سيجيت

. ازاى ؟

سيجيت بتحط التاريخ فى شكل كود مكون من اربع او خمس ارقام فى سطر data code عالهارد ، الكود ده من الشمال اول خانتين السنه . الخانتين اللى بعدهم الاسبوع واخر خانه اليوم. YYWWD ولكن إمعانا فى الغلاسه سيجيت بتتعامل ب السنة المالية Fiscal year مش السنة العادية

. يعنى السنة عندهم تبدأ من السبت الأول من شهر يوليو . مش من اول يناير. مؤخرا ربنا هداهم وبقو يكتبو التاريخ زى خلق الله.

بص سيبك من الصداع ده اللينك ده فيه اداه صغيره كده تحطلها الكود يقولك التاريخ ده ايه. منها لله سيجيت

حملها من هنا

https://bit.ly/3zJKZdP

اه بالمره بقى من ضمن رخامه سيجيت، هى بتصنع إما فى تايلاند فيتكب Site Code عالهارد UK واما فى الصين فيتكتب WU

اختبار الهارد:

طالما انت اشتريت مستعمل ف انا ما بعترفش باختبار ال Health كتقرير نهائي للهارد. راجع البوست ده فى صفحتنا

https://bit.ly/3POboNg

امال اختبر ازاى هارد مستعمل. بص من الاخر كده

full read full write

تملاه داتا وتقرا اللى كتبته منه . كل ده وحضرتك مش بعيد عن الهارد بتسمعه عن قرب عند الكتابة عليه والقراءة منه ممكن فيه تكه او صوته بيعلا. كل ده لازم تاخده فالحسبان

الضمان:

ايوه انا عارف انه مستعمل وكده . بس حاول تطلع من البائع بأى مده ضمان ولو أسبوع او اتنين كافيين انه تجربه كويس قراءه وكتابه قبل ما تحط عليه داتا تندم لو ضاعت